En defensa do sistema público de saúde

11902376_1136474686381552_8661329797296593100_n

Mañá día 3 a Xunta de Persoal do SERGAS convoca na nosa cidade unha manifestación en contra da privatización da sanidade.

O escándalo do novo hospital de Vigo, explica perfectamente os motivos polos cales o modelo que se nos quere impoñer dende o goberno do PP funciona única e exclusivamente para o beneficio da empresa privada, sendo @s pacientes tratadas coma se fosen clientes/as que un bo día, deciden facer uso do servizo de saúde por diversión, en lugar do que realmente é: un servizo imprescindible para tod@s e que ninguén usa por gusto.

Mañá, sen dubida, veremos a unha gran parte do goberno local na manifestación. Non está de máis lembrar que o PSOE tamén é culpable desta desfeita, xa que no seu momento (1997, estes procesos tardan en mostrar os seus efectos) votou a favor da lei do goberno de Aznar que permitiu o inicio da privatización da saúde no estado español. A maiores, na lexislatura de Zapatero, unha proposta da esquerda plural aprobada polo PSOE (2009) foi quedando atrás na súa tramitación sen que nunca se chegase a concretar.

Acabada a lexislatura, chegou o PP ao poder e unha vez máis o PSOE mostra a súa hipocrisía votando unha vez máis a favor da derrogación da lei, esta vez dende a oposición en minoría.

O bipartidismo sempre acaba coincidindo no esencial e non pode haber nada mais esencial que os grandes beneficios que a privatización da saúde trae para as empresas privadas.

Anova-Vigo quere mostrar o seu total apoio á mobilización de mañá e anima a toda a cidadanía a acudir, a pesar de que será imposible non coincidir con hipócritas que só se poñen detrás da pancarta, mentres o seu partido colabora na privatización da saúde.

Advertisements
En defensa do sistema público de saúde

NÓS TAMÉN SOMOS GRECIA

11698870_932111750165724_7970531554423811057_n

Nas eleccións de xaneiro de 2015 o pobo grego votou un programa contra a austeridade e pola reestruturación da débeda. O goberno de Siryza negociou coa Comisión Europea unha solución que permitise derrotar a austeridade e recuperar o crecemento económico e os dereitos das traballadoras á negociación colectiva, das pensionistas a unha vida digna e do pobo grego no seu conxunto á dignidade e a democracia fronte aos poderes financeiros e a Troika.

Mais, a maioría neoliberal existente na Unión Europea fixo imposíbel un acordo aceptábel. Diante desta chantaxe o goberno grego decidiu que sexa o pobo o que decida se acepta ou rexeita a última oferta recibida. O goberno de Siryza chama a votar NON.

O combate pola democracia do pobo grego é o máis importante, en Europa, nas últimas décadas. O que está en xogo é se nas sociedades europeas mandan os pobos ou o capital financeiro e as organizacións da gran patronal.

No histórico discurso en que comunicou ao pobo grego a convocatoria do referendo Alexis Tsipras dixo:

Pediron ao goberno grego que aceptase unha proposta que inclúe unha nova carga insostible para o pobo grego e que socava a recuperación da economía e da sociedade grega, unha proposta que non só perpetúa o estado de incerteza, senón que acentúa aínda máis as desigualdades sociais.
A proposta das institucións inclúe medidas que conducen á desregulación do mercado de traballo, recortes nas pensións, máis reducións nos salarios do sector público e un incremento do IVE dos alimentos, restaurantes e turismo; ao tempo que elimina as exencións fiscais para as illas gregas.

E rematou:

Grecia é o berce da democracia e vai enviar unha resposta contundente e democrática a Europa e ao mundo.
Persoalmente, comprometinme a respectar o resultado da escolla democrática, sexa cal sexa.
E estou absolutamente seguro de que a vosa escolla honrará a historia do noso país e enviará unha mensaxe de dignidade ao mundo.
Nestes momentos críticos, temos que lembrar todos que Europa é o fogar común dos pobos. Que en Europa non hai propietarios e hóspedes.
Grecia é, e seguirá a ser, unha parte integrante de Europa e Europa unha parte integrante de Grecia. Pero sen democracia, Europa será unha Europa sen identidade e sen rumbo.
Convídovos a todos a mostrar a unidade nacional e a tranquilidade, co fin de tomar as decisión correctas.
Para nós, para as xeracións futuras, para a historia dos gregos.
Pola dignidade e a soberanía do noso pobo.

Por iso nós, cidadás e cidadáns galegos estamos hoxe aquí, en pé, co pobo grego, defendendo a dignidade e a soberanía dos pobos, o seu dereito a decidir como queren organizar a vida común, o seu dereito a decidir, tamén, entre distintas políticas económicas.
Por iso denunciamos a actitude do goberno do Partido Popular que se alineou coas posicións máis duras da Comisión Europea para intentar dar un aviso aos desexos maioritarios dunha mudanza política e económica que beneficie a maioría social. Denunciamos tamén a complicidade do PSOE coas políticas antisociais da Troika.
E por iso ao defendermos os dereitos do pobo grego defendemos o noso dereito á liberdade, á soberanía e á democracia fronte ao ditado dos grandes capitais.
Viva a loita do pobo grego contra as imposicións da Troika!
Viva a loita do pobo grego pola democracia e a soberanía!
Nós tamén somos Grecia.

NÓS TAMÉN SOMOS GRECIA

As antimareas [Opinión]

Dende as primeiras manifestacións artístico-literarias clásicas até as máis recentes, como a banda deseñada ou o cinema, a figura da personaxe protagonista ou a do heroe ten decote coma contraposición dialéctica e antitética a figura do antagonista ou a do antiheroe. Sendo as manifestacións artísticas reflexo das sociedades e de todos os motores que as moven ao longo da historia, non é estraño tamén que os fenómenos de antagonismo se produzan con total naturalidade nun eido tan decisivo como o da política.

Desde hai uns meses as inquedanzas e aspiracións de cambio e ruptura democrática de boa parte do pobo traballador desorganizado e da esquerda política e social, producíu a proliferación das denominadas mareas ou candidaturas de unidade popular no eido local (que non localista) de toda a xeografía galega, sexa urbana, vilega ou rural.

Os tres partidos que levan sete lustros a se repartiren o poder en Galiza, luxados por casos de corrupción e enchufismo, sinalados por un pobo sen liberdade nin dereitos e acosados pola queda electoral a consecuencia do esgotamento de modelo, ollan con preocupación cara unhas mareas nas que a xente do común, os partidos pequenos e os movementos sociais conflúen e unen forzas para o mudar absolutamente todo.

É entón cando, temeroso ante a posibilidade de perder os seus privilexios, o sistema pon en marcha toda a súa maquinaria para frear ás mareas, dende os ataques, difamacións e intoxicacións directas orquestradas desde os seus partidos e medios de comunicación afíns até operacións de descrédito directas, pasando, como non, pola estratexia da confusión que produce apoiar e promocionar dende os sumidoiros esas outras mareas que nacen supostamente dun xeito espontáneo nos mesmos lugares onde xa se foron constituíndo as mareas orixinais.

Esta estratexia produce:

  • A lóxica confusión entre o electorado na que sempre navegan moito mellor os partidos xa consolidados e coñecidos.
  • A sensación de caos e de “máis do mesmo” que tamén beneficia os partidos do rexime e sistémicos.
  • A división do voto rupturista e, polo tanto, o afastamento de boa parte do electorado abstencionista que se ilusiona ante movementos de confluencia, como aconteceu con AGE en 2012.
En definitiva. A imitación, a parodia, a falsificación e a ridiculización das mareas por medio do que non son outra cousa que antimareas.

Porén, o pobo é mais intelixente do que pensan os cerebros do sistema e os seus partidos títere. As camadas agredidas que, con tan só un mes de existencia, elevaron con forza a suma feita desde arriba pola esquerda independentista, a esquerda federalista e a ecosocialista no outono de 2012, están xa a recibir con esperanza e ilusión esa suma aínda maior, feita desde abaixo e coa participación aberta e democrática do pobo traballador, que significan as mareas. O resto, partidos do rexime e antimareas, son iso: partidos do rexime e antimareas. Vai sendo hora de lle chamar ás cousas polo seu nome.

Moncho Lareu Riveiro.
Abril de 2015
Publicado no nº 52 do xornal A Peneira.
As antimareas [Opinión]

Por un transporte colectivo, público, ecolóxico e seguro [Opinión]

As infraestruturas que nos rodean e que financiamos cos cartos de impostos, cotizacións e demáis tributos, foron planificadas atendendo ás necesidades das clases mais favorecidas e dos intereses da oligarquía capitalista que nos goberna dende Madrid e Bruxelas. Estas infraestruturas están pensadas sobretodo para artellar unha rede de servizos turísticos para o consumo de burguesías foráneas, onde a burguesía autóctone sexa unha mera xestora e as clases traballadoras do País fagamos o papel de man de obra barata, precaria e sen dereitos.

Daí que as inversións en infraestruturas sexan as que son: AVE, portos deportivos, aeródromos, campos de golf… intraestruturas para o beneficio dunha pouca xente privilexiada, namentres a clase obreira temos que sufrir unhas dotacións deficitarias, obsoletas e perigosas. Sirva como exemplo paradigmático a mortal autovía Vigo-Mos-Porriño.

É por iso que dende a esquerda independentista levamos moitos anos a reivindicar unha rede de transporte público para toda a área metropolitana de Vigo e unhas infraestruturas ao servizo da clase traballadora, isto é, do 99% da poboación. Nomeadamente, a cidade olívica e toda a área metropolitana precisan dunha estación central que ligue a alta velocidade cun ferrocarril de proximidade e cercanías que conecte toda a área con comunicacións por tren entre todas as áreas residencias e centros de traballo. Esa estación debería ser tamén sede do trasporte por autobús metropolitano e urbano de Vigo e arredores.

Aliás, exceptuando o FEVE de Ferrol, Galiza é a única nación peninsular que non conta cunha rede de trens de cercanías para a súas principais áreas metropolitanas e industriais. Unha rede que, no caso de Vigo, Baixo Miño, O Condado, A Paradanta e Morrazo, sexa un medio para unir estas comarcas e levar ás traballadoras e aos traballadores dende as súas residencias aos seus centros de traballo durante as 24 horas do día. De feito, cómpre ter en conta o elevadísimo número de xente de Vigo que traballa nos concellos dos arredores, e viceversa.

Temos que ser conscientes da perigosidade para as vidas e a integridade física da clase traballadora que supoñen as estradas e autoestradas que vertebran a nosa área e, tamén, que a ordenación do territorio, o estudo das infraestruturas de comunicación e de transporte e os servizos públicos deberían ser planificados para demarcacións territoriais máis amplas que o concello.

Cómpre exixir logo, unha estación de tren intermodal que enlace o cada vez máis necesario e urxente tren de cercanías ecolóxico e sustentábel cos trens de longo percorrido substituíndo as súas máquinas por outras de menor custo e aproveitando, coa súa modernización e restauración, os viais da antiga rede de tranvía de Vigo e comarca. Non podemos permitir que máis traballadoras e traballadores perdan a vida a ir ou voltar dos seus centros de traballo.

Moncho Lareu (Militante de Anova Vigo-Mos)

Febreiro de 2015

Publicado no xornal A nova Peneira nº50

Por un transporte colectivo, público, ecolóxico e seguro [Opinión]

Anova concorrerá ás municipais de 2015 dentro da Marea de Vigo

logoweb
A Asemblea Local de Anova-Vigo Mos quere anunciar que concorrererá ás eleccións municipais do vindeiro 24 de maio na plataforma cidadá Marea de Vigo, renunciando así a presentarse en solitario en coherencia coa inequívoca aposta de Anova Irmadade Nacionalista, dende a súa fundación como organización política, polos procesos de Unidade Popular e de aglutinación de forzas.

E esta decisión ten claros fundamentos: a Marea de Vigo conta con máis de 2.000 apoios ao seu manifesto, entre os cales figuran, con nomes e apelidos, centos de persoas representativas do mundo sindical, do feminismo, da cultura e dos movementos sociais máis activos nesta cidade.

A Marea de Vigo, dende a súa presentación pública en setembro do ano pasado, mantivo unha actividade continua e aberta á participación de toda a cidadanía.

Catro asembleas, a última o día 19 deste mes, foron trazando as liñas de actuación: aprobouse unha estratexia legal pra concorrer ás eleccións, aprobouse un código ético, un protocolo de primarias e tamén un documento de programa participativo que segue aberto a novas achegas.

As primarias da Marea, as únicas por agora que teñen lugar en Vigo, xa están en marcha.

O prazo de postulación de candidaturas abriuse o día 20 e pecharase o 4 de marzo. Entre o 5 e o 13 os candidatos e candidatas faran campaña, e o día 14 de marzo serán as votacións.

O único requisito pra participar nestas eleccións primarias é concordar e ter asinado o manifesto da Marea antes do 4 de marzo, día que se pechara o censo de votantes co obxectivo de que o Comité de Primarias dispoña de tempo suficiente pra poñelo en orde. Manifesto que pode ser asinado en liña aquí: http://www.mareadevigo.org/?page_id=49

Dese proceso sairá, ben seguro, unha candidatura rupturista, plural e de confluencia, capaz de vencer os partidos do réxime e poñer o Concello de Vigo no camiño da democracia plena, cuns orzamentos sociais e total trasparencia fronte á corrupción sistémica.

Anova-Vigo Mos entende que a Marea é a Plataforma que está a desenvolver un traballo máis sólido e participativo e considera que só a través da confluencia a través dela se está en disposición de facer fronte ao bipartidismo do réxime

Abel Caballero, o candidato da dereita en Vigo, ten serios motivos pra estar preocupado: o seu autoritarismo represivo, os casos crecentes de corrupción e a incapacidade pra dialogar coa cidadanía pasaranlle factura en maio.

Asemblea de Anova Vigo-Mos

 

Anova concorrerá ás municipais de 2015 dentro da Marea de Vigo

Anova e as eleccións municipais de 2015 en Vigo

10353090_416403378484666_8831325277162667138_n
Martiño Noriega: “En Anova apostamos pola Marea de Vigo como espazo para a unidade popular”
 
O portavoz de Anova-Irmandade Nacionalista xunto a Xosé Manuel Beiras mantivo unha xuntanza con membros da Coordinadora Local da súa formación en Vigo para interesarse polo proceso das municipais na cidade
 
Vigo 20 de febreiro de 2015-. A este respecto, o voceiro valorou moi positivamente os procesos de unidade popular que se están a desenvolver no país. Martiño definiunos como imprescindíbeis para rematar coa podremia do réxime e puxo como exemplo a Marea de Vigo, amais doutros: “En Vigo Anova aposta pola unidade popular creada ao redor da Marea de Vigo, ao igual que apoiamos outras iniciativas populares como Ourense en Común, Compostela Aberta ou BoiroNovo, entre outras moitas”. Así mesmo, apelou á xenerosidade da esquerda e do nacionalismo para acadar amplos acordos e chama ao protagonismo da cidadanía activa: “Ou deixamos de delegalo todo e exercemos como cidadáns ou entregámonos como vasalos dos corruptos”.
 
Preguntado sobre o elevado número de candidaturas que se poden dar nalgúns lugares coma Vigo, Noriega confía en que con paciencia e xenerosidade ao final se chegue a unha confluencia máis que necesaria: “É hora de escoller se optimizamos forzas contrarias ao bipartidismo, se primamos a confluencia sobre a competencia, ou se lle facemos o favor a este dispersando candidaturas. Precisamos unha concentración parcelaria das enerxías”, apuntou. 
 
Martiño insistiu na responsabilidade histórica das agrupacións políticas, que deben deixar fóra os intereses partidarios e os réditos electorais, mais tamén na corresponsabilidade necesaria dos movementos sociais e os cidadáns e cidadás que están a exercer como tales: “Ninguén sobra. O que nos xogamos é gañar espazos públicos para a cidadanía co obxectivo de cambialo todo e darlle dunha vez unha patada ao bipartidismo no cu de Feijóo”, rematou Noriega.
Anova e as eleccións municipais de 2015 en Vigo

Inicio do proceso de primarias internas de Anova-Vigo

A Asemblea Local de ANOVA-Vigo Mos aprobou onte, día 9 de febreiro, o inicio dun proceso de primarias internas que culminará o próximo sábado, día 14, cunha votación en urna e por vía telemática.

ANOVA, na súa Conferencia Nacional celebrada en Vigo o 24 de xaneiro, ratificou a súa firme aposta polas plataformas cidadás de confluencia, alí onde existan.

Na nosa cidade, o proceso da Marea de Vigo leva un percorrido de meses, cun firme traballo en forma de convocatorias sempre en aberto para toda a cidadanía e con tres asembleas xerais onde de forma pública, democrática e transparente se tomaron decisións como a organización dos grupos de traballo, a aprobación do protocolo de primarias abertas ou a escolla dunha estratexia respecto á fórmula legal.

Non consideramos ningún outro proceso de confluencia como posible alternativa na nosa cidade. O traballo realizado xenerosamente por ducias de persoas, tanto militantes de organizacións políticas, activistas sociais e cidadanía non organizada anteriormente, ten para nós un valor incalculable.

O obxectivo destas eleccións internas en Anova é a escolla de candidatas/os da nosa organización pra participarmos con lealdade e compromiso construtivo no proceso de primarias abertas da Marea de Vigo, que comeza o día 20 de febreiro e que culminará na primeira semana de marzo coa proclamación dunha candidatura xeral que concorrerá aos comicios municipais de maio.

As candidatas e candidatos de Anova presentaranse aos medios o próximo luns, día 16, en rolda de prensa na que daremos cumprida información.

Coordinadora Local Anova-Vigo Mos.

Inicio do proceso de primarias internas de Anova-Vigo