Beiras denuncia a criminalización do movemento veciñal de Vigo e solidarízase co activista Xurxo a quen piden dous anos e medio de cadea

O portavoz de Alternativa Galega de Esquerda e o grupo parlamentario apoian a loita do barrio de Coia en defensa dos dereitos sociais e unha política ao servizo da cidadanía

Santiago de Compostela, 10 de febreiro de 2015.- A criminalización dos movementos sociais e veciñais contrarios á barbarie neoliberal é unha das estratexias preferidas do poder. Así o considera Xosé Manuel Beiras, portavoz de Alternativa Galega de Esquerda (AGE), que denuncia o sostido ataque das autoridades á xente que protesta ao tempo que amosa a súa solidariedade e a do seu grupo parlamentario co activista Xurxo R.M., a quen solicitan dous anos e medio de cadea e unha multa de 1.200 euros.

 

O xuízo contra este integrante do movemento veciñal de Coia en defensa dos dereitos sociais será mañá, mércores, ás 10.30 da mañá. Detido no desaloxo da protesta da rotonda de Coia o pasado 7 de xaneiro, en que os máis de 40 policías enviados polo alcalde Abel Caballero foron os únicos que empregaron a violencia, a Xurxo pídenlle dous anos e medio de prisión por unhas supostas lesións a un axente que os alí presentes negan. A maiores, outros dous activistas están imputados a partir de relatos parciais da policía.

 

“O réxime está esgotado”, contextualiza Beiras, “e utiliza a represión para intentar que a cidadanía renuncie a defender os seus dereitos e as conquistas de décadas e décadas de loita”. Segundo o portavoz de AGE, quen reivindica como propias as esixencias do movemento veciñal vigués de dereitos sociais e políticas centradas nas persoas, “é a propia cidadanía organizada, como as veciñas e veciños de Coia, a que fai posíbel a mudanza de réxime cara a outro en que a democracia e a liberdade teñan contido real”.

 

Advertisements
Beiras denuncia a criminalización do movemento veciñal de Vigo e solidarízase co activista Xurxo a quen piden dous anos e medio de cadea

Carta aberta ao reitor da Universidade de Vigo Salustiano Mato

ANOVA-Vigo quere apoiar o comunicado do grupo de Acción Feminista ANOVA facendo públicas as ameazas, manifestacións de abuso de poder, coaccións e actitudes misóxinas que veñen sufrindo os traballadores e as traballadoras da comunidade universitaria, en especial mulleres, por parte de Sergio Pajares Domínguez, Xefe de Sección do Servizo de Contratación Económica da Universidade de Vigo.

Tralas diversas denuncias que se teñen realizado por parte de diferentes colectivos de persoas afectadas por esas actuacións, quer diante do Reitor, quer diante doutros organismos universitarios (Unidade de Igualdade, Comisión de Intervención e Resolución de Conflitos, Tribunal de Garantías) e diante da indiferencia e da inacción dos diferentes órganos universitarios, Acción Feminista ANOVA decidiu dirixirse á opinión pública para comunicar o seguinte:

1º Que non entende a inhibición da Universidade de Vigo (Reitor, Xerencia e Directora da Unidade de Igualdade) ante as continuadas denuncias de feitos tan graves dentro da comunidade universitaria.

2º  Que un xefe de sección de contratación económica con conductas misóxinas, ameazadoras e coactivas non garante os dereitos e as condicións laborais dos traballadores/as da comunidade universitaria.

3º Que nun momento tan delicado, onde as universidades públicas están sendo ameazadas por procesos de privatización moi agresivos, estas conductas dividen á comunidade universitaria, debilítana e fana máis vulnerábel a estes ataques neoliberais.

Acción Feminista ANOVA solicitou do Reitor da Universidade de Vigo:

1º O cese inmediato dese responsábel e a consecuente apertura de expediente disciplinario.

2º Que se lle retire cautelarmente a súa participación no foro da universidade, mecanismo que este xefe de sección de contratación utiliza especialmente para as súas ameazas, coacións, abuso de poder e conductas misóxinas.

Para ANOVA-Vigo a conquista definitiva da igualdade entre os seres humanos pasa polo rexeitamento público deste tipo de comportamentos, en cuxa condea ademáis debe coincidir toda a nosa afiliación.

Galiza, 2 de febreiro de 2015

Asinado.

Anova – Vigo

Carta aberta ao reitor da Universidade de Vigo Salustiano Mato

Anova Vigo apoia a manifestación contra a instalación do Bernardo Alfageme en Coia

1486777_10200096503731457_6254347628879195595_n
Este venres día 16, ás 20:00 h, con saída dende a Praza de América e remate na rotonda de Coia, o colectivo cidadán Asemblea Aberta de Coia convoca unha manifestación en protesta pola colocación do barco Bernardo Alfageme na rotonda do Alcampo.

Este barco histórico foi cedido ao Concello para usos exclusivamente culturais e coa súa colocación na rotonda quedará desprovisto de toda utilidade práctica.

En dous plenos diferentes (novembro e decembro de 2014), e sempre por maioría, as/os representantes da cidadanía votaron en contra desta decisión. Porén, Abel Caballero está a usar a Xunta de Goberno para tomar decisións unilaterais dunha forma totalmente antidemocrática, usando os cartos de todas na súa precampaña electoral.

Os colectivos cidadáns integrados na Asemblea Aberta de Coia levan anos traballando a prol dos mais desfavorecidos do barrio de Coia e de toda a cidade, denunciando as graves inxustizas que comete o Concello de Vigo no campo das políticas sociais como cando denega axudas de emerxencia, incumpre a ratio legal de traballadoras sociais por habitante e trata de ocultar a masiva bolsa de pobreza que crece día a día na nosa cidade con medidas como o peche do local de Sereos.

O barco non é nin mais nin menos que un símbolo. O símbolo do Vigo que non queremos o símbolo dunhas políticas que esquecen á xente e poñen medidas estéticas moi discutibles por diante das necesidades da xente.

Por estes motivos, Anova Vigo apoia a mobilización deste venres e invita as/os cidadáns a mostrar o seu rexeitamento a que os cartos, non do barrio de Coia senón de toda a cidade, sexan empregados dun xeito inhumano.

Anova Vigo apoia a manifestación contra a instalación do Bernardo Alfageme en Coia

O CONFLICTO DE COIA. Crónica dun desatino urbanístico

coia4 coia1 coia2 coia3

Nos primeiros días de decembro, sen adxudicación de obra e contra a decisión do pleno municipal, o alcalde Abel Caballero ordena o inicio das obras na rotonda de Coia pra instalar o barco Bernardo Algageme.

A empresa encargada de realizar esas obras é Civis Global, herdeira de Movexvial, contratista habitual do Concello e desaparecida a raíz do escándalo das facturas falsas das 5 Jotas.

Sobre este asunto foi chamado a declarar o xerente dalgunhas das empresas do grupo Eiriña, adxudicataria de obras como a “humanización” da Rúa Nicaragua, que casualmente subcontratou o traballo a empresa da que o concelleiro de Parques y xardíns, Ángel Rivas (PSOE), era Xerente, Hormigones Valle Miñor.

.

O día 4 pola mañá un conxunto de veciños e veciñas deciden acudir ao lugar pra deteren as obras, obxectivo que conseguen a pesar de presentarse varios axentes da policía local.

Por efecto desa acción veciñal faise público o despropósito que supón gastar 300.000 euros na instalación do barco, cando as necesidades básicas de moitas familias non están sendo atendidas polo Concello, que decidiu recortar en 2014 as axudas sociais.

Varios colectivos veciñais do barrio de Coia convocan e poñen en marcha a Asemblea aberta de Coia, que nas semanas posteriores e ata o día de hoxe será quen leve as rédeas deste conflito.

O alcalde Abel Caballero fai declaracións reafirmándose na súa decisión de instalar o barco e comeza unha serie de críticas e ataques contra a veciñanza, acusando as persoas que participan nos actos de protesta de pertenceren a grupos políticos marxinais.

A Asemblea aberta de Coia mantén de forma continua a vixilancia sobre a rotonda, mediante quendas por grupos que permanecen no lugar día e noite pra evitar que as obras se reanuden.

En resposta ás acusacións de Abel Caballero a Asemblea de Coia convoca unha manifestación nas Travesas pra o día 12 de decembro baixo o lema: «Non pode ser, o barco na ratonda e as familias sen comer», á que asisten preto de un millar de persoas que percorren a avenida Castelao deica a rotonda.

O día 15 os veciños ocupan a rotonda de xeito pacífico unha vez máis e son desaloxados pola policía local. A consecuencia desa acción será detido o veciño S., que non estivera presente nesa concentración.

O día 23 celébrase na rotonda, cuxas obras seguen paralizadas, un concerto no que participarán diversos grupos de Vigo e ao que acoden multitude de persoas. O alcalde solicitara a intervención da policía nacional, ao que a subdelegación do Goberno respondeu dicindo que non intervirán «salvo que se produzan desordes», cousa que non sucede.

Na madrugada do 23 pra o 24, Abel Caballero ordena pechar a rotonda cun valado metálico e unha malla opaca, pra dificultar o acceso.

O día sete de xaneiro a Asemblea intenta ocupar de novo a rotonda, intervén a policía local e prodúcese a detención de Xurxo, acusado de resistencia e agresión á autoridade, feito que os vídeos en poder da Asemblea demostran que é falso. Por esa causa Xurxo foi imputado, e tras un intento de xuízo rápido o día 8, cunha petición fiscal de tres anos de cadea, o caso quedou aprazado pra o día 4 de febreiro, de xeito que a avogada Esther Lora poida presentar as probas da defensa.

O día 9 de xaneiro, ao presentarse na comisaría como testemuña dos feitos do día 15 de decembro, Diego é detido e inculpado pola policía local por resistencia á autoridade.

O 10 de xaneiro tivo lugar unha rolda de prensa da Asemblea de Coia na parroquia do Cristo da Vitoria, á que acudiron multitude de persoas, e na que o lema foi: «Xustiza social. Non represión policial.»

A día de hoxe, 11 de xaneiro, faise público nos medios que o concelleiro de Seguridade Carlos López Font (PSOE) trasladou á subdelegación do Goberno a identidade dunhas corenta persoas por participar nos actos pacíficos de protesta, o que se concretou en 25 denuncias presentadas ante a Fiscalía contra os veciños e veciñas, habitantes de Coia e doutros barrios de Vigo.

En declaracións recentes, o alcalde Abel Caballero afirma que estes actos contra a instalación do barco non sou cousa dos veciños de Coia senón de militantes de «AGE, Anova, o Partido Comunista, algúns de Podemos, a CIG, o BNG, e por detrás o PP apoiándoos». Ou sexa, acusa á maioría das forzas políticas existentes na cidade.

 

Por todos estes motivos, Anova Vigo manifesta o seu total apoio a esta reivindicación veciñal e quere facer públicas varias consideracións:

Abel Caballero non actúa como un demócrata ao desoír e condenar as protestas, senón de xeito empecinado e autoritario. Non ten capacidade nin vontade de diálogo.

Como xa fixera no caso da Cruz do Castro, Abel Caballero ignora a opinión pública e responde con ataques e accións represivas propias dun alcalde franquista.

O alcalde utiliza a policía local neste caso como garda pretoriana, e forza aos seus axentes a actuar máis alá das funcións que lle son propias.

Enfróntase á cidadanía de xeito obcecado e intenta criminalizar as súas lexítimas reivindicacións mediante acusacións falsas e denuncias de agresións sen fundamento.

Abel Caballero reacciona deste xeito porque se ve frustrado na realización da súa campaña pre-electoral, por medio de investimentos ridículos e innecesarios coma o das escaleiras mecánicas da Porta do Sol. E ao facelo compórtase non coma un rexedor municipal de talante demócrata senón coma un «pequeno ditador» desconectado da realidade e que se empeña en crear problemas inexistentes.

Anova ten o convencemento de que o pobo de Vigo está tomando boa nota do conflito social que provocan as accións extremistas de Abel Caballero e responderá de xeito contundente nas eleccións municipais do 24 de maio.

Vigo, 11 de xaneiro de 2015

Anova-Vigo Mos.

 

O CONFLICTO DE COIA. Crónica dun desatino urbanístico

Visita de Antón Sánchez, deputado de AGE, a Coia

Este serán o deputado de Alternativa Galega de Esquerdas no Parlamento Galego, Antón Sánchez, achegouse á rotonda de Coia a mostrar a súa solidariedade cos veciños e veciñas autoorganizados que resisten dende hai varios días fronte o despotismo dun Abel Caballero empeñado en chantar o barco Bernardo Alfageme, cos elevados custos que isto ten, na rotonda da rúa Castelao.

Visita de Antón Sánchez, deputado de AGE, a Coia